Loksins tími til að blogga.

Í gær var hurðin löguð þannig að nú þarf ég alltaf að taka upp lykil til að komast inn. Það er svosem ágætt, smá öryggi sem felst í því að geta læst húsinu. Í millitíðinni var þó öðru hjóli stolið en ekki er vitað um fleira sem var fengið að láni. Nú veit ég þó að Leuven er ansi örugg borg:)

Síðustu helgi fórum ég og Þórhildur í heimsókn til Ástu í Leiden. Leiden er mjög skemmtilegur staður og íbúðin hennar Ástu alveg einstaklega kósý. Ég og Þórhildur gerðum ferðina til Leiden að ævintýri með því að gera smá gloríur á leiðinni. Við fórum út á vitlausri lestarstöð í Antwerpen svo að við misstum af lestinni til Leiden. Það nýttum við okkur til að hafa matarstopp í Antwerpen á meðan við biðum eftir næstu lest. Þegar hún loks kom eftir fjörtíu mínúta seinkun stukkum við inn í hana án þess að athuga neitt frekar hvort hún stoppaði í Leiden. Raunin var sú að hún gerði það ekki. Við komum því við á Schiphol til þess að taka út jólaskreytingarnar þar. Þetta gekk þó allt saman upp á endanum og tókst okkur að koma okkur til Leiden. Helginni eyddum við svo í rólegheitum, fórum í marga drykki hér og þar og skoðuðum okkur um. Þórhildur og Ásta voru svo ansi myndalegar og dunduðu sér við hannyrðir yfir skemmtilegu spjalli heima hjá Ástu.

Í gær fór ég á Cantus sem er einstaklega skemmtilegur viðburður og ég held að sé eitthvað sem ég gæti hugsað mér að innleiða á Íslandi. Þar situr fólk saman við borð og á einu háborði situr Cantusstjórinn. Allir fá textabækur með ýmsum textum til að syngja. Í gær var international cantus og lögin voru allt frá gaudeamus til mama mia. Cantusstjórinn segir hvað skal syngja og inn á milli stendur hann upp og skálar og allir þurfa að drekka, yfirleitt til botns. Svo segir hann stundum að einhverjir þurfi að standa upp á stól eða borði. Alls kyns skemmtilegir leikir og reglur sem hann setur á meðan á cantusnum stendur. Í gær áttu t.d. öll þjóðerni að syngja þjóðsöng sinn. Ég var eini íslendingurinn og söng því þjóðsöngin ein upp á stól.

Á morgun er ég svo að fara til Brussel til Þórhildar og erum við að hugsa um að fara til Bruge á sunnudaginn. Þórhildur er svo búin að bjóða mér að koma í heimsókn í þingið og ætla ég að fara með henni í vinnuna á mánudagsmorguninn.

Það var ekki fleira að sinni
Kveðja til kreppulands

Hildur